In Entstehung

Neujahrsvorsätze


Neujahrsvorsätze

Maria Smettan 2017

Vielleicht soiad ma oafach moi wos nummoi probiern,
denn wos soi scho groaß passiern,
es ko ja gar ned zu wos Schlechtarn führn.

Lakritz is für mi wos absolut Greißlichs,
aber vielleicht find i’s gar nimma so scheißlich.
Vielleicht soiad i Lakritz nummoi probiern,
denn wos soi scho groaß passiern,
es ko ja gar ned zu wos Schlechtarn führn.

Mit da Moni red i scho seid Jahren nimma,
denn de is a nachtragendes Frauenzimma.
Vielleicht soiad i so Manches oafach vergebn,
und über Anders mit ihr moi redn,
denn wos soi scho groaß passiern,
es ko ja gar ned zu wos Schlechtarn führn.

I geh seid Jahren nimma zu dera Feier,
weil des is oiwei desaibe Leier.
Vielleicht soiad i oafach moi wieda hi geh,
vielleicht werd’s sogar recht schee,
denn wos soi scho groaß passiern,
es ko ja gar ned zu wos Schlechtarn führn.