In Entstehung

Ned lang her, ned weit weg


Ned lang her, ned weit weg

Maria Smettan 2015

1. Stimme
Es is gor ned so lang her,
do hod a Magd scho in junge Johr 25 moi an Arbeitgeber wechseln miaßn.
 
2. Stimme
I gfrei mi,
wenn mi auf da Straß jemand oolächelt.
 
3. Stimme
Es is gor ned so weit weg,
do schiaßn de Leid aufranand.
 
2. Stimme
I gfrei mi,
wenn ma jemand beim Spülmaschin ausramma huift.
 
1. Stimme
Es is gor ned so lang her,
do is as Essen in Deitschland rationiert wordn.
 
2. Stimme
I gfrei mi,
wenn i na oiden Frau de Einkaufstüten naufdrong huif.
 
3. Stimme
Es is gor ned so weit weg,
do vahungan de arma Leid.
 
2. Stimme
I gfrei mi,
wenn i üba mein Schatten spring und mi wieda vatrog.
 
1. Stimme
Es is gor ned so lang her,
do ham bei uns 4 Leid auf 290 Kinder zwischen 2 und 10 Johr aufpasst.
 
2. Stimme
I gfrei mi,
wenn i ma de Zeit nimm und vasuach an bessern Weg zum findn.
 
3. Stimme
Es is gor ned so weit weg,
do wern Handys bis zum umfoin zambaut.
 
2. Stimme
I gfrei mi,
wenn i jemandn a Lächeln ins Gsicht zauber.
 
Ich
I gfrei mi,
wenn de Stimma in meim Kopf de richtige Balance ham.